Halam aleng lan

Halam aleng lan iha nah nyalam kelunan ha beh piah batung tam dep. Tuhan niyhu itam pahalam ji dahin ji dahin nangen ji dahin ji alem halam. Akui seng ngalung ji katah halam alem ji pasangan aleng huwi huwi pahalam ji dahin ji ja tam ja nuno erti halam aleng lan.
Dawa pasangan anih huwi huwi pahalam. Usi dawa ngenep paha'eh ji dahin ji. Lim lim dahun tengaran dawa, dawa na daho aleng sayu, daho ja paen nginah nyalam hinan nyalam harin dahin nyalam kelunan lim lim.
Alem urip dawa, dawa kuma halam dawa  en puboh ateng ateng baya. Mina dawa pah em jadi peji pahawa peji murip dawa kuma pedeng dawa, usi penting murip suami isteri paling penting nyalam ji dahin ji alem halam Tuhan. Men aring dawa pesuk ji dahin ji bulan pat 2011 ateng tegu ngalung blog anih dawa paen pahalam. Mijat jam kelunan awi dawa pahalam nunan. Pejamat peji paen haut dawa pesuk.
Haut tegu dawa pesuk ngedau kah malem kah levi kah jihima kah, dawa petangen ji dahin ji dahin duan ji dahin ji ja pahalam dahin ja puboh halam aleng uh dawa gem 28 duman aleng uh.
Halam dawa mula en ngetageng tegu dawa peji ha YH, MH, HV dahin PI. Tegu anan dawa kuma pedeng dawa ,dawa  tetap nyalam ji dahin sayu tegu melu, kate, perah, dahin tegu seneng pah.
Dawa pasangan anih uh ngejeloh duman 2012   dahin sukup sayu pejamat sayu.  Tegu dawa pesuk dawa pejamat, pekeluaan dahin ngelameng ji dahin ji ateng dawa em deng petat tegu dawa peji.
Alem nunan Tuhan duan dawa te malem 12January ji men dawa mimpi, Tuhan nyihu dawa na ju aleng sayu ha unan Tuhan, ji men dawa nangih dahin nangih ateng suara na em nei nyemau jihima anan. Iha nangih terus nangih pelemana asi Tuhan dahin pelamana dawa seng em jadi peji murip laan. Bi alem nutih pah dawa tetap berjanji kuma dawa paen pahalam alem nun nun pah keadaan.
Anan maksud halam aleng lan. Usi peletu dawa hadau nangen ji dahin ji, sembayang ji dahin ji dahin pehituk ji dahin ji ja tengayet alem kinah alem halam dahin alem lim ju urip.
Men 14 January dawa na janji seng tetap pahalam ji dahin ji dahin sa phalam ji dahin ji ateng dawa seng na ji tanda pedeng dawa.. dawa nyalam dahin pahalam paen ateng ateng baya sayu tegu melu sayu tegu kate.  Tegu daha nira kisah anih , akui hairan te cara Tuhan duan dawa ja dawa na ju aleng sayu alem urip dawa sebagai pasangan kekasih aleng setia lelan
AKUI naglung anih ja lim itam jam sayu nah itam pahalam paen paen. Men ika aleng basa na hituk im maksud halam aleng en ngalung anih. "Akui nyalam ika ateng ateng baya."